नेहरू सेंटर आर्ट गॅलरीत ‘आर्ट कॉन्टीनम’ या समूह प्रदर्शनाचे आयोजन

 

२५ समकालीन, प्रतिथयश कलाकारांच्या कलाकृतींचा समावेश 

 

आर्टिव्हल फाउंडेशन तर्फे दि ११ ते १७ फेब्रुवारी २०२५ दरम्यान ‘आर्ट कॉन्टीनम’ या समूह प्रदर्शनाचे आयोजन नेहरू सेंटर कलादालन, वरळी, मुंबई ४०००१८ येथे आयोजित करण्यात आले आहे.

 

या प्रदर्शनामध्ये मोहन नाईक, प्रदीप सरकार, कप्पारी किशन, भिवा पुणेकर, शशिकांत पाताडे, चंद्रकांत तजबिजे, निलेश दादा  निकम, रविंद्र तोरवणे, पारस परमार, ममता बोरा, डॉ. शेफाली भुजबळ, प्रविण उटगे, एच आर दास, दिपक गरुड, दामोदर मडगावकर, राखी शाह,  मोहित नाईक, जयश्री सवानी, मेधा नेरुरकर, कुरेश  बसराई, मिता व्होरा, तसनिम जमाल सोना,  सीमा शाह, शैलेश गुरव आणि पानेरी पुणेकर या २५ समकालीन, प्रतिष्ठित कलाकारांनी आपला सहभाग नोंदवला आहे.

हे राष्ट्रीय स्तरावरील प्रदर्शन असून या प्रदर्शनात महाराष्ट्र, दिल्ली, गुजरात, बंगलोर, हैदराबाद, कर्नाटक, गोवा, कोलकाता येथील कलाकारांचा सहभाग आहे. 

  

या कलाप्रदर्शनात निसर्गचित्रे, व्यक्तीचित्रे, वास्तवदर्शी चित्रे, ऐतिहासिक परंपरा, वारसा व संस्कृतीविशेष दाखवणारी चित्रे, धार्मिक संकल्पनांवर आधारित पारंपारिक चित्रे, आधुनिक आणि अमूर्त जीवनातील वास्तव दर्शवणाऱ्या अनेक शिल्पाकृती ठेवण्यात येणार आहेत, चित्रे तैलरंग, जलरंग, एक्रि्लिक, मिक्स मिडिया, चारकोल या माध्यमातील असून शिल्पाकृती ब्रॉन्झ, फायबर, मिक्स मिडिया मधील  आहेत.  या प्रदर्शनात  जवळजवळ ६० कलाकृती  एकाच छताखली रसिकांना बघता येतील.

 

या प्रदर्शनाचे आयोजन शरद गुरव, सतीश पाटील यांनी केले आहे

 

ग्रामीण आणि शहरी भागातील नवोदित, समकालीन कलाकरांना आपली कला प्रदर्शित करण्यासाठी एक उत्तम व्यासपीठ मिळवून देणे हा आर्टीव्हल फाउंडेशनचा उद्देश आहे. ‘आर्ट कॉन्टीनम’ हे प्रदर्शन याच प्रयत्नांचा एक भाग आहे. कला रसिकांनी चुकवू नये असेच हे प्रदर्शन आहे.

`

जहांगीर आर्ट गॅलरीत अजित देसवंडीकर यांचे 'अर्बन व्हिस्पर्स’ हे एकल चित्र प्रदर्शन

 

चित्रकार; अजित देसवंडीकर

सुविख्यात चित्रकार अजित देसवंडीकर यांच्या तैलरंगातील  नवनिर्मित चित्रांचे एकल प्रदर्शन जहांगीर आर्ट गॅलरी, काळा घोडा, मुंबई येथे ११ ते १७ फेब्रुवारी २०२५ या कालावधीत भरणार आहे. ते तेथे सर्वांना रोज सकाळी ११ ते संध्याकाळी ७ वाजेपर्यंत विनामूल्य बघता येईल.

या प्रदर्शनाचे उद्घाटन ११ फेब्रुवारी २०२५ रोजी संध्याकाळी ५ वाजता जहांगीर कलादालनात मान्यवर प्रमुख अतिथी श्री. प्रकाश बाळ जोशी यांच्या हस्ते होणार असून त्यावेळी डॉ. संजय भिडे, श्री अलेक्झांडर पर्मीनोव, श्री जीझस अलेजांड्रो डी ला रोसा, श्री ग्रॅहॅम लंडन, श्रीमती फिओना ग्रॅहॅम राऊस आणि श्रीमती सरला एन. ह्या कलाक्षेत्रातील मान्यवर अतिथींसह  रसिक, कलाप्रेमी व कलासंग्राहक यांची उपस्थित राहील. 

ह्या प्रदर्शनात अजि`त देसवंडीकर यांनी ठेवलेली तैलरंगाच्या  कलात्मक अर्थपूर्ण लेपनातून निर्मिलेली नागरी जीवनातील गतिमानता व अर्थपूर्ण कुजबुज तसेच तत्सम संकल्पना दर्शविणारी अनेक लक्षवेधी चित्रे सादर करण्यात आली आहेत.

अजित देसवंडीकर यांचे कलाशिक्षण मुंबईतील सर जे.जे. स्कूल ऑफ आर्ट येथे झाले. तेथे त्यांनी १९९४ साली BFA व १९९६ साली MFA या चित्रकलाक्षेत्रातील पदव्या संपादन केल्यावर आपली कलानिर्मिती सुरू केली व भारतातील तसेच परदेशातील अनेक प्रथितयश कलादालनातून आपल्या कलात्मक चित्रांचे एकल आणि सामूहिक कलाप्रदर्शनाद्वारे सादरीकरण केले. विद्यार्थीदशेत व त्यानंतरही त्यांना अनेक मान्यवर कलाप्रवर्तक संस्थांकडून पुरस्कार देऊन वेळोवेळी गौरविले गेले आहे. त्यांच्या चित्रप्रदर्शनांना नेहमी रसिकजनांचा व कलाप्रेमींचा तसेच कलासंग्रहकांचा उदंड व सकारात्मक प्रतिसाद लाभला आहे. त्यांची अर्थपूर्ण व कलात्मक चित्रे जगभरातील अनेक मान्यवर व सुप्रसिद्ध संग्राहकांकडे आहेत. 

प्रस्तुत प्रदर्शनात अजित देसवंडीकर यांनी ठेवलेली चित्रे एका विशिष्ट संकल्पनेवर आधारित आहेत. मुंबई व त्यासारख्या महानगरात आढळणारी गतिमानता, संघर्ष, तेथे जगण्यासाठी होणारे प्रयत्न, सामाजिक जीवन आणि शहरी वातावरणातील जीवघेणी स्पर्धा व जगण्याची अहमहमिका यांचे एक भावपूर्ण व उत्कट दर्शन त्यांच्या चित्रातून घडवितात. त्यांनी तैलरंगाचा कलात्मक व अर्थपूर्ण वापर करून आपल्या तंत्रशुद्ध वास्तववादी शैलीत निर्मिलेली ही विविधतेची चित्रे सर्व अपेक्षित दृश्यपरिणाम फार प्रभावीपणे दर्शवतात. रिक्षाचालक, विक्रेते, लोकल प्रवासातील दाटीवाटी व जीवघेणा संघर्ष, डबेवाले, गर्दीची मानसिकता, उत्तुंग इमारती व विविध ठिकाणी आढळणारी गर्दी व त्या बिकट आणि कठीण परिस्थितीवर मात करून आपला मार्ग सुखकर करण्याची सामान्य नागरिकांची मानसिकता व उत्कटता वगैरे दृश्यपरिणाम त्यांनी आपल्या चित्रमाध्यमातून एका विशिष्ट शैलीत रसिकांपुढे येथे सादर केले आहेत. पारंपरिक जीवनशैली व आधुनिकता यांचा कलात्मक समन्वय येथे त्यांनी साधला असून बदलत्या काळानुसार शहरी वातावरणात गतिमान जीवन जगताना मानवी मनाचे व एकंदरीत व्यक्तिमत्त्वाचे होणारे परिवर्तन आणि त्यात संभावणारे विविधलक्षी वेगवेगळे  बदल यांचे एक बोलके व आकर्षक तसेच अर्थपूर्ण दर्शन त्यांनी आपल्या चित्रांमधून सर्वांना घडवले आहे. 

 

चित्रकार; अजित देसवंडीकर

११ ते १७ फेब्रुवारी २०२५ या कालावधीत

जहांगीर आर्ट गॅलरी, काळा घोडा, मुंबई 

 

११ ते संध्याकाळी ७ वाजेपर्यंत

 

अधिक माहितीसाठी संपर्क क्रमांक : ९३२२२३४०५७